سهير جودة: الشماتة في مرض بيومي فؤاد ليس من الإنسانية
عبرت الإعلامية سهير جودة، عن شدة انزعاجها من شماتة مستخدمي مواقع التواصل الاجتماعي في مرض الفنان بيومي فؤاد، الذي تعرض لـ أزمة صحية أجبرته على الدخول للمستشفى، حيث جاءت الشماتة نتيجة لاختلاف هؤلاء مع الفنان بيومي فؤاد بعد تصريحاته في مسرحية موسم الرياض.
وقالت سهير في برنامجها «الستات» الذي يتم عرضه عبر فضائية النهار، قائلة: «أبشع حاجة في الحياة الشماتة، الشماتة في كل شيء، الشماتة في المرض وفي الكسرة وفي الفشل، أنك تشمت يعني أنت بعدت قوي عن كونك إنسان سوي، عن كونك إنسان أصلا، مهما كان اللي حاصل أيه يخلي إنسان يشمت في غيره عشان في يوم قال كلمة، أو كان له موقف مش على هواه، أو عشان أي حاجة حصلت، لا شماتة في الموت والمرض».
وتابعت: «بيومي فؤاد هو وابنه في أزمة صحية منعرفش تفاصيلها، كل اللي شفناه صورة ليهم وهم تحت أجهزة التنفس الصناعي، ربنا يشفيهم أجر وعافية، لكن وجعني وتعجبت من شماتة وشتيمة مش مفهومين!!، حتى في ابتلاء الله!!، خلاص بيومي بقى عدووو، بقى مرضه حاجة تفرح؟!».
وأضافت سهير: «صحيح في ناس زعلت منه لموقف معين وخلاص خلصنا، وخد رد فعل عمره ما هينساه، وأقوى وأعنف بالمناسبة من الفعل مليون مرة، تقريبا دي كانت أتقل طلعة مسرح طلعها في حياته كلها، كفاية بقى عليه كدة، مش يمكن اللي حصله ده بسبب قلبة الناس عليه بعد ما كان شخص محبوب، مش يمكن المرض ده نفسيا بسبب اللي بيمر بيه».
وأردفت: «هجوم في التعليقات رهيب، ناس كاتبة (ندعي لأهل فلسطين ولا نستطيع الدعاء لك)، وناس تانية تكتب (مش أغلى من فلسطين وشهداءها أطفالا ونساءً وشيوخًا ورجالًا)، ايه التدني في الأخلاق ده!».
واختتمت سهير جودة حديثها، قائلة: «بيومي فؤاد لسة بيدفع ثمن موقفه على المستوى المهني، فلو سمحتوا خلو عندكم قدر من الأخلاق، لا شماتة في المرض، في حديث عن الرسول عليه الصلاة والسلام (لا تُظْهِرِ الشَّمَاتَة لأَخِيكَ فَيرْحَمْهُ اللهُ وَيبتَلِيكَ)، كفاية وارحموه وادعوله يقوم بالسلامة لأسرته وأولاده».
