قمة الرومانسية.. تعرف على قصة حب منى الشاذلي وزوجها
تصدرت الإعلامية منى الشاذلي محركات البحث جوجل، وذلك بعد كشفها عن قصة تعارفها بزوجها، وذلك خلال حلولها ضيفة برنامج ABtalks الذي يقدمه الإعلامي الإماراتي أنس بوخش.
وقالت منى الشاذلي: لما قررت اسافر إيطاليا علشان أشتغل قررت إني مقعش في الحب وأركز في شغلي ومستقبلي لكن وقعت في الحب وفي الأول لا كنت بطيقه ولا هو كان طايقني كنا بنضطر ننزل مع صحابنا علشان مش بنطيق بعض لحد ما بقينا عايزين نقعد لوحدنا وقد كان ومعظم العلاقات اللي بتبدأ بخناق بتعيش لمدة طويلة.
قصة حب منى الشاذلي وزوجها
وأضافت: أنا وهو دلوقتي تمينا 25 سنة مع بعض وأنا وجوزي متناقضين في كل حاجه وهو مش رومانسي.. هو حنون ورجل عائلة عظيم، لكنه راجل عملي، ومش بنزعل من الاختلاف بينا.
وتابعت: الولاد والبنات لازم يتربوا على تحمل المسئولية، والحب حاجة والحياة الزوجية حاجة، ولو اكتافك متتحملش المسئولية متتجوزش، لازم تربي أولادك على أنهم يشيلوا المسئولية ويتحملوا ضغوط الحياة، غير كدا هيبقى جواز عيال، فالحياة الزوجية محتاجة مجهود كبير.
وأردفت منى الشاذلي حديثها قائلة: العاطفة دون عقل رشيد لا تصبح عاطفة تصبح عبثا.. وأنا في العموم إنسانة وديعة وقوية من جوا، وبشوف أقوى الناس هما الهاديين مش بالحنجرة والصوت العالي.. وبعمل حذف لأي ذكرى مؤذية وجدانية بالنسبة لي.
